მშვენიერი კითხვაა, არა? ბევრ დედას სურს ვუნდერკინდი გაზარდოს, მაგრამ, თუ გენიოსების ახლობლების (მეუღლეებისა და ნათესავების) დღიურებსა და წერილებს გადავხედავთ, აღმოვაჩენთ, რომ მათ გვერდით ცხოვრება რთული შრომა და ტანჯვაც კი არის. თავად ნიჭიერი ადამიანებიც ხშირად წუხან თავიანთი ნიჭის გამო, რომელიც მათგან ძალებს იწოვს და სიგიჟისკენ უბიძგებს. გენიოსი და ჯანმრთელობა, კეთილდღეობა, სიმდიდრე, ბედნიერება ხშირად შეუთავსებელი რამ არის.
მოდით, ცოტათი შევავიწროოთ კითხვის საზღვრები და ნიჭზე ვისაუბროთ. შეიძლება თუ არა ნიჭიერი ბავშვის გაზრდა? აქ პასუხები არსებობს და ისინი მიდრეკილებებისა და წინაპირობების სფეროშია.
ყოველ ადამიანს დაბადებიდანვე აქვს ესა თუ ის თავისებურება, რომელიც უნიკალურ „ნახატად“ ყალიბდება — ინტერესი, გატაცება კონკრეტული თემით, თვითგამოხატვა. თუ დროულად დაინახავთ, ამოიცნობთ ამ თავისებურებებს და საკმარის მხარდაჭერას მისცემთ მათ, მიდრეკილებები დაიწყებენ ტრანსფორმაციას თვისებებად, უნარებად, გამოცდილებად.
ამისათვის საჭიროა ბავშვისთვის სტიმულებით მდიდარი გარემოს შექმნა, მისთვის მრავალფეროვანი (მათ შორის შემოქმედებითი) საქმიანობის შეთავაზება, მისი ხმის მოსმენა და იმის გარკვევა, რაზე რეაგირებს ის ყველაზე მეტად.
ზოგიერთი ბავშვი დაახლოებით ერთი წლიდან უკვე ცეკვავს და მღერის, სხვებს შეუძლიათ საათობით ისხდნენ კონსტრუქტორთან, ზოგი კი გატაცებით ხატას. მნიშვნელოვანია მხოლოდ უფროსების ყურადღება და მოთმინება — სწორედ ეს არის ბავშვის ნიჭის გამოვლენის გასაღები.
