გაჭიმვის ვარჯიშები ორსულებისთვის

კუნთების გაჭიმვა ორსულობის დროს ძალიან სასარგებლოა.

აი, ვარჯიშების შესრულების ზოგადი წესები:

• გაჭიმვით შეგიძლიათ დაკავდეთ მხოლოდ იმ შემთხვევაში, თუ ექიმმა ნება დაგრთოთ და არ გაქვთ სამედიცინო უკუჩვენებები;
• თუ ვარჯიშების დროს ან მის შემდეგ გაგიჩნდათ მტკივნეული ან უსიამოვნო შეგრძნებები — ვარჯიში უნდა შეწყვიტოთ;
• გაჭიმვა გააკეთეთ კუნთების მცირე გახურების შემდეგ და თანდათან გაზარდეთ ამპლიტუდა;
• უნდა გამოირიცხოს ყველა ვარჯიში რყევებითა და მით უმეტეს უეცარი მოძრაობებით. ნებადართულია მხოლოდ სტატიკური პოზები, მათი შენარჩუნება შეიძლება 5-15 წამი, თქვენი მომზადების მიხედვით;
• მეორე და მესამე ტრიმესტრში არ შეიძლება ზურგზე წოლითი ვარჯიშების გაკეთება;
• მესამე ტრიმესტრში ორსული ქალის სახსრები და მყესები განსაკუთრებით ძლიერ რბილდება, ამიტომ გაჭიმვისას ძალიან ფრთხილად უნდა იყოთ, რათა ტრავმა არ მიიღოთ.

რა ვარჯიშებია სასარგებლო?

შეგიძლიათ თავად შეასრულოთ სულ მარტივი ვარჯიშები, მაგალითად, მხრების წრიული მოძრაობები სხვადასხვა მიმართულებით, წელზე შეკრული ხელების აწევა და დაწევა.

ასევე შეგიძლიათ გააკეთოთ გაჭიმვა:

• წვივის კუნთების — უნდა დადგეთ, კედლიდან 2 ნაბიჯით უკან, და ხელებით მასზე დაყრდნობით, შეასრულოთ ნელი „აწევა-დაწევა“, ქუსლების იატაკიდან მოწყვეტის გარეშე. გააკეთეთ 5-დან 10-მდე გამეორება;
• ბარძაყის კუნთების — დაჯექით იატაკზე გაშლილი ფეხებით და მონაცვლეობით დაადეთ ერთი ფეხის კოჭი მეორე ფეხის მუხლზე, 5-10 გამეორება;
• კისრის, მხრების და ზურგის კუნთების — უნდა დადგეთ და ხელები მიადოთ კარის ჩარჩოს მკერდის დონეზე, მუხლები მოდუნდეთ და ნიკაპი ჩამოწიოთ ქვემოთ, ზურგი მოხაროთ შეძლებისდაგვარად. გააკეთეთ სუნთქვის ორი ციკლი. თანდათან გაასწორეთ მუხლები და დაუბრუნდით საწყის მდგომარეობას. 5-10 გამეორება.

ასევე კარგია უბრალოდ ჯდომა, ფეხებგადაჯვარედინებული „თურქულად“, სწორი ზურგით და საკუთარ სუნთქვაზე დაკვირვება. დაიწყეთ რამდენიმე წუთით და თანდათან მიიყვანეთ 15-მდე, თუ ამ პოზაში კომფორტულად გრძნობთ თავს.

ეს გაჭიმვის ყველაზე მარტივი ვარჯიშებია, ისინი უნივერსალურია და თითქმის არ აქვთ უკუჩვენებები. თუ უფრო ინტენსიური ვარჯიშები გსურთ, მაშინ უმჯობესია, სავარჯიშო კომპლექსი ინდივიდუალურად შეგირჩიოთ ინსტრუქტორმა.