სიცოცხლის პირველი წელი ბავშვის განვითარების ყველაზე დინამიკური პერიოდია. ამ დროს ის გადის რამდენიმე მნიშვნელოვან ეტაპს, რომლებიც დაკავშირებულია როგორც ფიზიოლოგიურ, ისე ფსიქოლოგიურ ცვლილებებთან და საჭიროებს მშობლების მუდმივ ყურადღებასა და მხარდაჭერას.
ადაპტაცია და ზრდა. ბავშვის განვითარების ერთ-ერთი ყველაზე მნიშვნელოვანი ეტაპია დედის სხეულის კომფორტული გარემოდან დამოუკიდებელ ცხოვრებაზე გადასვლა. ეს რთული პროცესია, რომელიც დაკავშირებულია ორგანიზმის ფიზიოლოგიური პროცესების, ჰორმონალური სისტემებისა და ორგანოების თანდათანობით „მომწიფებასთან“. ბავშვის ორგანიზმი სწავლობს გარემოში დამოუკიდებლად არსებობას. ამ პროცესს თან ახლავს აქტიური ზრდა, ფსიქომოტორული რეაქციების განვითარება, პიროვნული თვისებების ჩამოყალიბება და ენერგიის დიდი დანახარჯი. ამიტომ ამ პერიოდში განსაკუთრებით მნიშვნელოვანია მშობლების ზრუნვა, მხარდაჭერა და ბავშვის საჭიროებების დროული დაკმაყოფილება.
კვება. განვითარების მნიშვნელოვანი ეტაპია დამატებითი საკვების ეტაპობრივი შეტანა. ამ პერიოდში კუჭ-ნაწლავის ტრაქტში მიმდინარეობს ფერმენტული ცვლილებები და ორგანიზმი ახალ საკვებთან შეგუებას იწყებს. სწორედ ამიტომ აუცილებელია, რომ დამატებითი კვება სწორად და ეტაპობრივად დაინერგოს, რათა თავიდან იქნას აცილებული საჭმლის მომნელებელი სისტემის შესაძლო პრობლემები.
ფსიქომოტორული განვითარება. სიცოცხლის პირველ წელს აქტიურად ვითარდება ბავშვის ცენტრალური ნერვული სისტემა. ჩნდება და მყარდება რეფლექსები, იზრდება მოძრაობითი აქტივობა, ვითარდება ინტელექტუალური უნარები, იწყება მეტყველების ჩამოყალიბება და თანდათან ყალიბდება კოგნიტური, ანუ შემეცნებითი შესაძლებლობები.
მშობლების ყურადღება, მხარდაჭერა და სწორი გარემო ეხმარება ბავშვს, რომ განვითარების ყველა ეტაპი ჰარმონიულად და ბუნებრივად გაიაროს.
