რა ხდება?
ორსულობის 23-24-ე კვირის ბოლოს თქვენი პატარას ორგანიზმი სწრაფად უახლოვდება სრულყოფილებას. მისმა სახემ შეიძინა დამახასიათებელი ნაკვთები და ისე გამოიყურება, როგორსაც დაბადების შემდეგ ნახავთ. ბავშვის ყველა ორგანო და სისტემა აქტიურად ფუნქციონირებს. სრულად ჩამოყალიბდა ბრონქები, ხოლო ფილტვები დაიფარა სურფაქტანტის (ზედაპირულად აქტიური ნივთიერებების ნარევი) გარსით, რომელიც ხელს შეუშლის მათ გამოშრობას. ორსულობის 24-ე კვირისთვის ნაყოფს იწყებს მუშაობას საოფლე და ცხიმოვანი ჯირკვლები.
თქვენი მდგომარეობა
თქვენ კიდევ უფრო მოიმატეთ წონაში და სუნთქვა გაგიჭირდათ. ორსულობის 24-ე კვირას კვლავ შეიძლება შეგაწუხოთ ყაბზობამ, გულძმარვამ, ქვედა კიდურების ღამის კრუნჩხვებმა, შეშუპებამ. დიდი მუცლის გამო გიჭირთ გადაადგილება, უხერხულია ძილი და დამოუკიდებლად ფეხსაცმლის თასმების შეკვრაც კი. ასევე შეიძლება შეამჩნიოთ, რომ სწრაფად იღლებით. ეცადეთ დღის განმავლობაში დაისვენოთ, რადგან შემდგომში ეს შეგრძნება მხოლოდ გაძლიერდება.
ორსულობის 23-24-ე კვირას ბევრი ქალი განიცდის ბრექსტონ-ჰიქსის ცრუ შეკუმშვებს. ეს სულაც არ არის საშიში: უმნიშვნელო კუნთების შეკუმშვების დახმარებით საშვილოსნო ემზადება მომავალი მშობიარობისთვის. როდესაც შეკუმშვების შეგრძნება გაგიჩნდებათ, დაწექით ნახევარი საათით და დაისვენეთ. თუ ამის შემდეგ კუნთების შეკუმშვა გრძელდება, თანაც გარკვეული პერიოდულობით და სხვა სიმპტომებიც უერთდება, ეს შეიძლება იყოს ნაადრევი მშობიარობა. ორსულობის 24-ე კვირა ის ვადაა, როდესაც თქვენი პატარა ჯერ არ არის მზად დაბადებისთვის, ამიტომ ზურგისა და მუცლის ტკივილის, სისხლიანი გამონადენის, მენჯის არეში ძლიერი ზეწოლის შემთხვევაში სასწრაფოდ გამოიძახეთ სასწრაფო სამედიცინო დახმარება!
თქვენს ორგანიზმში მიმდინარე ცვლილებებმა შეიძლება გამოიწვიოს სხვადასხვა ტკივილი. მაგალითად, ორსულობის 24-ე კვირას ჩნდება მტკივნეული შეგრძნებები ზურგისა და წელის არეში სიმძიმის ცენტრის გადაადგილების გამო. მშობიარობისთვის მომზადების ერთ-ერთი ეტაპია მენჯის ძვლების "დაშორება", ამიტომ შეიძლება იგრძნოთ დისკომფორტი გავის არეშიც.
ბევრი მომავალი დედა ორსულობის 23-24-ე კვირას აწყდება ბუასილთან დაკავშირებულ ყველა უსიამოვნებას. დაავადების პირველივე ნიშნებისთანავე გადახედეთ დღის რაციონს და ჩართეთ მენიუში ბოჭკოთი მდიდარი საკვები და პროდუქტები, რომლებსაც საფაღარათო ეფექტი აქვთ. ასევე ეცადეთ არ გაცივდეთ და უფრო ხშირად დაისვენოთ. გარდა ამისა, შეგიძლიათ შეიძინოთ აფთიაქში რექტალური სანთლები, მაგრამ მხოლოდ ექიმთან კონსულტაციის შემდეგ.
რისკ-ფაქტორები
ორსულობის 24-ე კვირის ერთ-ერთი საფრთხე დიაბეტია, ამიტომ მომავალ დედას ძალიან მნიშვნელოვანია იცოდეს სისხლში შაქრის დონე. თუ ის უმნიშვნელოდ გაიზარდა, ეს ნორმად ითვლება, მაგრამ მისი ძლიერი მატება ორსულობის დიაბეტის ნიშანია, რომელიც ზრდის რთული მშობიარობის რისკს, იწვევს ნაყოფის ჭარბ წონას და შეიძლება ახალშობილში არტერიული წნევის დაქვეითების მიზეზი გახდეს.
ორსულობის 24-ე კვირას შესაძლებელია ნაადრევი მშობიარობა. მის დაწყებას თან ახლავს შეტევითი ტკივილები მუცლისა და მენჯის არეში, ასევე საშვილოსნოს დაჭიმულობა და "გამაგრება". ამავდროულად შეიძლება მოხდეს სანაყოფე წყლების დაღვრა, ზოგჯერ ჩნდება ყავისფერი ან სისხლიანი ლორწოვანი გამონადენი.
ორსულობის 23-24-ე კვირის კიდევ ერთი რისკია შეშუპება, რომელიც შეიძლება იყოს გესტოზის ერთ-ერთი სიმპტომი. გარეგნულად ისინი მაშინვე არ ჩანს, ამიტომ ყურადღებით უნდა აკონტროლოთ თქვენი წონა, ეცადოთ არ გადატვირთოთ კვებით, მიიღოთ ექიმის მიერ რეკომენდებული ვიტამინები, დაიცვათ სასმელი რეჟიმი და შეასრულოთ ვარჯიშები.
სამედიცინო დაკვირვება
ორსულობის 24-ე კვირას ულტრაბგერითი გამოკვლევა იშვიათად კეთდება. ის ინიშნება მხოლოდ ჩვენების მიხედვით ან იმ შემთხვევაში, თუ გამოტოვებული იყო სკრინინგული ულტრაბგერითი გამოკვლევა. გამოკვლევის დროს ექიმი განსაზღვრავს ნაყოფის მდებარეობას საშვილოსნოში, აფასებს ბავშვის ორგანოების სწორ განვითარებას, მოძრაობით აქტივობასა და გულისცემას, პლაცენტის მდგომარეობასა და მდებარეობას, ამნიონური სითხის რაოდენობას.
გარდა ამისა, ორსულობის 24-ე კვირას შეიძლება დაინიშნოს საერთო ანალიზები. ჩვეულებრივ, ასეთი გამოკვლევები ტარდება მომავალი დედის ჯანმრთელობის მდგომარეობის დარღვევების დროს, ერითროციტებისა და ლეიკოციტების რაოდენობის, შაქრის დონისა და შარდში ცილის არსებობის შესამოწმებლად.
რეკომენდაციები ორსულობის 24-ე კვირას
ორსულობის 23-24-ე კვირას აუცილებელია ყურადღებით აკონტროლოთ თქვენი ჯანმრთელობა არა მხოლოდ სამედიცინო, არამედ ფსიქოლოგიური თვალსაზრისითაც. ეცადეთ არ ინერვიულოთ წვრილმანებზე, რადგან ადრენალინის გამოყოფამ შეიძლება ზიანი მიაყენოს თქვენს პატარას.
ახლა ძალიან მნიშვნელოვანია აქტივობის შენარჩუნება: თუ თავს კარგად გრძნობთ, უფრო ხშირად ისეირნეთ, დაკავდით ცურვით, ორსულებისთვის განკუთვნილი იოგით. ორსულობის 24-ე კვირას სპორტი მომავალ დედებს ნებადართული და რეკომენდებულიც კია! ფიტნესის სისტემატური ვარჯიშები ახდენს თქვენი ორგანიზმის ყველა სისტემის ნორმალიზებას, ამზადებს მას მშობიარობის დროს მოსალოდნელი დატვირთვებისთვის და უზრუნველყოფს ბავშვის წარმატებულ განვითარებას. შესანიშნავი ვარიანტია ვარჯიშები ფიტბოლით (აერობიკა დიდი ტანვარჯიშის ბურთით): ისინი დაგეხმარებათ სახსრებისა და ხერხემლის განტვირთვაში, პლაცენტაში სისხლის მიმოქცევის გაუმჯობესებაში და ნაწლავების პერისტალტიკის ნორმალიზებაში.
ორსულობის 23-24-ე კვირის შემდეგ ქალებს ხშირად უჩნდებათ ძილის პრობლემები. ნორმალურად დასასვენებლად, ღამით აუცილებლად გაანიავეთ საძინებელი. საწოლში უფრო კომფორტულად მოკალათებაში დაგეხმარებათ ორსულებისთვის განკუთვნილი სპეციალური ბალიში. ფეხების ღამის კრუნჩხვების კარგი საშუალებაა ყურძნის თესლის ან ხორბლის ჩანასახის ზეთით მასაჟი, ხოლო გულძმარვისგან გვირილის ან პიტნის ჩაი ლიმონით გაგათავისუფლებთ.
