წონა იმატებს კუნთების განვითარებისა და კანქვეშა ცხიმის დაგროვების ხარჯზე (თანაც, ყავისფერი ცხიმის გარდა, ჩვეულებრივი, "თეთრი" ცხიმის დაგროვებაც დაიწყო). სიგრძეში ბავშვი ახლა ცოტა ნელა იზრდება.
რა ხდება?
ორსულობის 26-ე კვირა ის მომენტია, როდესაც ნაყოფის ჰიპოფიზი ზრდის ჰორმონს გამოყოფს. თქვენი პატარას ტვინი ამყარებს კავშირს თირკმელზედა ჯირკვლის ქერქთან, რის წყალობითაც სხვა ჰორმონების გამომუშავებაც იწყება. ამ ვადაზე სრულდება ფილტვის ალვეოლების ფორმირება, თავად ფილტვები კი საბოლოო ადგილს იკავებენ.
რძის და მუდმივი კბილების ჩანასახები უკვე ჩამოყალიბებულია და უკანასკნელები ორსულობის 26-ე კვირას იწყებენ გაძვალებას. ბავშვის კანი ნელ-ნელა გლუვდება და იცვლის ფერს, ხოლო ძვლოვანი სისტემა აგრძელებს გამაგრებას. თქვენს პატარას უკვე შეუძლია ხედვა, თუმცა ჯერჯერობით ის ძალიან შორსმხედველია და ყველაფერს ბუნდოვანი ფერადი ლაქების სახით აღიქვამს.
თქვენი პატარა საკმაოდ აქტიურია და თქვენ მუდმივად გრძნობთ მის მოძრაობებს. ორსულობის 25-26-ე კვირას ნაყოფი უმეტესად თავით ქვემოთ მდებარეობს, მაგრამ ადვილად შეუძლია პოზიციის შეცვლა. ამჟამად ეს არ უნდა იყოს შეშფოთების მიზეზი.
ბავშვს კარგად ესმის, მას შეუძლია ხმების გარჩევა და მუსიკის დამახსოვრებაც კი. დაიწყეთ მისთვის იავნანების სიმღერა და დაბადების შემდეგ პატარა ნაცნობი მელოდიების ხმაზე დამშვიდდება.
თქვენი მდგომარეობა
ორსულობის 25-26-ე კვირას გაზრდილი მუცელი აუცილებლად აისახება თქვენს მდგომარეობაზე და თქვენ კვლავ განიცდით ყველა თანმხლებ სიმპტომს. ქოშინი, გულძმარვა, ნაწლავების შებერილობა, წვივის კუნთების კრუნჩხვები, ყაბზობა და სხვა უსიამოვნებები, სამწუხაროდ, მომავალი დედების მუდმივი თანამგზავრები ხდებიან პატარას დაბადებამდე. მეორე ტრიმესტრის ბოლოს ხშირად იკლებს სისხლში ჰემოგლობინის დონე, ამიტომ გინეკოლოგმა შეიძლება დანიშნოს რკინის შემცველი პრეპარატების მიღება.
ორსულობის 26-ე კვირას ქალების უმეტესობამ უკვე კარგად იცის, რა არის ტკივილი ზურგსა და წელის არეში. დისკომფორტის მინიმუმამდე შესამცირებლად, მეტი დაისვენეთ დივანზე: გაჭიმული ფეხებით წოლა ხსნის დატვირთვას ხერხემალზე. ზურგის ტკივილის კარგი პროფილაქტიკაა იოგა ან ორსულებისთვის განკუთვნილი ტანვარჯიში.
ორსულობის 26-ე კვირისთვის ბევრ მომავალ დედას შეიძლება დაეწყოს ტკივილი ნეკნების ან ნეკნქვეშა არეში. ის დაკავშირებულია საშვილოსნოს ზეწოლასთან შინაგან ორგანოებზე ან ბავშვის მკვეთრ მოძრაობებთან. შეეცადეთ იპოვოთ სხეულის ოპტიმალური მდგომარეობა, რომლის დროსაც მტკივნეული შეგრძნებები არ იქნება ისეთი ძლიერი.
თუ ბუასილის ნიშნები გაგიჩნდათ, არავითარ შემთხვევაში არ უგულებელყოთ ეს სიმპტომები. აცნობეთ პრობლემის შესახებ ექიმს და განიხილეთ მასთან რექტალური სანთლების ან სხვა სამკურნალო საშუალებების გამოყენების შესაძლებლობა, რომლებიც ნებადართულია ორსულობის 26-ე კვირაზე. მზად იყავით იმისთვის, რომ შეიძლება გაგიჩნდეთ თავის ტკივილი. მის თავიდან ასაცილებლად საჭიროა უფრო მეტად ისეირნოთ სუფთა ჰაერზე და სრულფასოვნად დაისვენოთ. თუ თავი მაინც აგტკივდათ, დაწექით ნახევრად ბნელ, კარგად ვენტილირებად ოთახში და ეცადეთ დაიძინოთ – ხშირად სწორედ ძილი ეხმარება ასეთი სახის შეუძლოდ ყოფნასთან გამკლავებაში.
რისკ-ფაქტორები
ორსულობის 25-26-ე კვირის საშიშროებებია გესტოზის, რკინადეფიციტური ანემიისა და ნაადრევი მშობიარობის განვითარების რისკი. ორსულობის შეწყვეტის პროვოცირება შეიძლება ჩვეულებრივმა გაციებამაც კი გამოიწვიოს. ამიტომ მომავალმა დედამ თავი უნდა დაიცვას გადაციებისგან, თავიდან აიცილოს უარყოფითი ემოციური განცდები და დროულად მოაგვაროს ჯანმრთელობის პრობლემები. თუ მუცელი აგტკივდათ ან საშოდან უჩვეულო გამონადენი გაგიჩნდათ, დაუყოვნებლივ მიმართეთ გინეკოლოგს კონსულტაციისთვის.
ასევე, ამ ვადაზე ულტრაბგერითი გამოკვლევის შედეგების მიხედვით შეიძლება გამოვლინდეს ისეთი პათოლოგია, როგორიცაა პლაცენტის ნაადრევი დაბერება. ის გვხვდება:
- მრავალნაყოფიანი ორსულობის დროს;
- ენდოკრინული დაავადებების დროს (შაქრიანი დიაბეტი, ჰიპოთირეოზი, თირეოტოქსიკოზი);
- საშვილოსნოს კედლის სტრუქტურის დარღვევისას, რომელიც დაკავშირებულია წინა რთულ მშობიარობებთან ან აბორტებთან;
- სასუნთქი, გულ-სისხლძარღვთა და საშარდე სისტემების ქრონიკული დაავადებების დროს;
- ორსულობის გართულებების დროს (გვიანი ტოქსიკოზი, რეზუს-კონფლიქტი, პლაცენტის არასწორი მდებარეობა, საშვილოსნოსშიდა ინფექცია);
- ინტოქსიკაციების დროს (მოწევა, ალკოჰოლის მოხმარება).
ორსულობის 25-26-ე კვირას შეიძლება დაირღვეს დედიდან ბავშვამდე საკვები ნივთიერებებისა და ჟანგბადის მიწოდების მექანიზმი, რის გამოც ნაყოფის განვითარება შეფერხდება და არსებობს ჟანგბადის შიმშილის რისკი. პლაცენტის დაბერების პირველივე ნიშნებისთანავე აუცილებელია სასწრაფოდ დაიწყოთ მკურნალობა. მაშინ არასასურველი შედეგის საშიშროება მინიმუმამდე შემცირდება.
სამედიცინო დაკვირვება
სავარაუდოდ, მეორე დაგეგმილი ულტრაბგერითი გამოკვლევა უკვე ჩატარებულია, მაგრამ ხდება ისეც, რომ ექიმი ულტრაბგერით გამოკვლევას ორსულობის 26-ე კვირაზეც ნიშნავს. გამოკვლევა შეიძლება საჭირო გახდეს სამედიცინო ჩვენებების მიხედვით ან თუ რაიმე მიზეზით ის ადრე არ გაკეთებულა.
ულტრაბგერითი გამოკვლევის დროს სპეციალისტი შეამოწმებს ნაყოფის შინაგანი ორგანოების, მისი ჩონჩხის განვითარებას, ასევე განსაზღვრავს ნერვული სისტემის მანკებისა და სხვა გადახრების წარმოქმნის რისკს. გარდა ამისა, გამოკვლეულია საშვილოსნო: შიდა კუნთოვანი შრის მდგომარეობა, პლაცენტის მიმაგრების ადგილი და მდებარეობა, ამნიონური სითხის ხარისხი და რაოდენობა.
ასევე ორსულობის 26-ე კვირას ინიშნება შარდისა და სისხლის საერთო ანალიზები, მოწმდება შაქრისა და ჰემოგლობინის დონე, რის შემდეგაც საჭიროების შემთხვევაში რეკომენდებულია სპეციალური დიეტა ან მედიკამენტები მაჩვენებლების კორექტირებისთვის. რეზუს-უარყოფითი სისხლის ჯგუფის მქონე ქალებს უტარებენ ანტისხეულების ტესტს.
რეკომენდაციები ორსულობის 26-ე კვირას
ორსულობის 25-26-ე კვირას საუკეთესო დროა ძუძუთი კვებისთვის მოსამზადებლად: დაიბანეთ მკერდი გრილი წყლით, მიიღეთ საჰაერო აბაზანები, ნაზად დაიმასაჟეთ ძუძუსთავები უხეში პირსახოცით, მაგრამ ზედმეტად არ გააღიზიანოთ ისინი, რათა საშვილოსნო ტონუსში არ მოვიდეს.
მზარდი მუცელი ძილში გიშლით ხელს. მეტი კომფორტისთვის საწოლში თან წაიღეთ პატარა ბალიშები, რომლებიც შეგიძლიათ ზურგის, მუცლის, ფეხების ქვეშ ამოიდოთ, ან შეიძინოთ ნახევარმთვარის ფორმის სპეციალური ბალიში.
ორსულობის 26-ე კვირა ის პერიოდია, როდესაც ძალიან მნიშვნელოვანია დასვენება, მაგრამ არ დაივიწყოთ ისიც, რომ ჯანმრთელობისთვის აუცილებელია მოძრაობა. თუ უკუჩვენებები არ არსებობს, ისეირნეთ ფეხით, გააკეთეთ ტანვარჯიში, მაგრამ არ აწიოთ სიმძიმეები. ახლა ფრთხილად უნდა იყოთ და მოერიდოთ დაცემას, რადგან მას შეუძლია გამოიწვიოს პლაცენტის აშრევება, სანაყოფე წყლების ნაადრევი დაღვრა და მშობიარობის დაწყება. არ გადაიღალოთ და თუ სისუსტეს იგრძნობთ, მაშინვე დაწექით. ქოშინის დროს კარგია ჩაჯდომის პოზა.
ორსულობის 25-26-ე კვირას განაგრძეთ თქვენი წონის კონტროლი. ეცადეთ აკონტროლოთ მადა და მიირთვათ მხოლოდ ახალი, ბავშვისთვის სასარგებლო პროდუქტები.
