რა ხდება?
ნაყოფის იმუნური სისტემა აქტიურად მუშაობს. თქვენს პატარას უვითარდება საკუთარი ანტისხეულები, რომლებიც მას დაბადების შემდეგ დაიცავს. კარგად ფუნქციონირებს ნერვული სისტემა, რის წყალობითაც პატარა ადამიანს უკვე შეუძლია ემოციების განცდა, ტკივილის შეგრძნება, სმენა, მხედველობა და გემოვნების შეგრძნება.
ორსულობის 32-ე კვირას გრძელდება ჩონჩხის განვითარება. მთელი სხეულის ძვლები იზრდება და ძლიერდება, მაგრამ თავის ქალა უნდა დარჩეს მოქნილი, რათა ნაყოფს გაუადვილდეს სამშობიარო გზებზე გადაადგილება.
ამჟამად ბავშვის სიგრძე დაახლოებით 42,5 სმ-ია, ხოლო წონა – დაახლოებით 1700 გრ. ამ ვადისთვის საშვილოსნო ძალიან ვიწრო გახდა თავისუფალი მოძრაობებისთვის და თქვენ კიდევ უფრო მკაფიოდ გრძნობთ თქვენი პატარას მოძრაობებს. ბავშვის ბიძგების პროვოცირება შეიძლება ნებისმიერმა რამემ – ხმამაღალმა ხმებმა, კაშკაშა სინათლემ. მაგრამ ბავშვის გადაჭარბებული აქტივობა 31-32 კვირაზე ზოგჯერ გამოწვეულია არა მხოლოდ გარეგანი გამღიზიანებლებით, არამედ ჟანგბადის ნაკლებობითაც, ამიტომ დედამ უნდა აკონტროლოს მისი მოძრაობების სიხშირე და ხასიათი. ნორმაში, ფხიზლობის დროს ბავშვმა საათში 4-დან 6-მდე მოძრაობა უნდა გააკეთოს.
თქვენი მდგომარეობა
ორსულობის 31-32-ე კვირას მომავალ დედებს უძლიერდებათ დაღლილობის შეგრძნება. მუცლის გადიდებისა და შინაგანი ორგანოების გადაადგილების გამო ბევრი უხერხულობის განცდა გიწევთ. ამ პერიოდისთვის დამახასიათებელია ტკივილი ნეკნქვეშა და წელის არეში, თანაც უკანასკნელი ხშირად გადაეცემა დუნდულებსა და ფეხებში. გიჭირთ სიარული, პრაქტიკულად შეუძლებელია ძილისთვის კომფორტული პოზის არჩევა, გარდა ამისა, გაწუხებთ ხშირი შარდვის მოთხოვნილება. სიცილს, ცემინებასა და ხველებას ზოგჯერ თან ახლავს შარდის მსუბუქი შეუკავებლობა. ამ პრობლემისგან თავის დაღწევაში დაგეხმარებათ სავარჯიშოები, რომლებიც მიმართულია მენჯის კუნთების გამაგრებაზე.
საჭმლის მომნელებელი ორგანოების ზეწოლის გამო ორსულობის 32-ე კვირას ჩნდება სიმწარე პირში, გულძმარვა, ბოყინი და მუცლის შებერილობა. პრაქტიკულად ყველა ორსული ქალისთვის ნაცნობია ყაბზობა და ბუასილი. კიდევ ერთი პრობლემა, რომელსაც მომავალი დედები აწყდებიან, არის სუნთქვის გაძნელება. მჯდომარე მდგომარეობაში საშვილოსნოს ზეწოლა დიაფრაგმასა და ფილტვებზე ძლიერდება, რის გამოც შეიძლება იგრძნოთ ჰაერის უკმარისობა, გულისრევის შეგრძნება და თავბრუსხვევა.
სავარაუდოდ, უკვე გაქვთ შეშუპებები. ორსულობის 31-32-ე კვირას პრობლემა შეიძლება გამწვავდეს. თუ შეშუპება უმნიშვნელოა, განსაკუთრებული შეშფოთების მიზეზი არ არის, საკმარისია მხოლოდ რაციონის კორექტირება – ამისთვის საჭიროა მარილის მოხმარების შემცირება და ყოველდღიურად არანაკლებ 1,5 ლიტრი სითხის დალევა. მაგრამ თუ შეშუპება დიდი ხნის განმავლობაში არ გადის, აცნობეთ ამის შესახებ თქვენს ექიმს, რადგან ის შეიძლება იყოს გესტოზის, თირკმელების ფუნქციის დარღვევის ან მომატებული წნევის ნიშანი.
რისკ-ფაქტორები
ორსულობის 32-ე კვირის ძირითადი საფრთხეებია ნაადრევი მშობიარობა, გესტოზი და პლაცენტის აშრევება.
ვადამდელი მშობიარობა, როგორც წესი, მოულოდნელად იწყება. მოულოდნელი ძლიერი დიარეა, საშოდან წყლიანი გამონადენი (ამნიონური სითხე შეიძლება გადმოვიდეს ნაკადის სახით ან წვეთ-წვეთობით გამოვიდეს), მუცლის შემომხვევი ტკივილები და გახშირებული შეკუმშვები ორსულობისთვის საფრთხის ნამდვილი ნიშნებია.
ყურადღება უნდა მიაქციოთ ყავისფერ, სისხლიან გამონადენსაც. მუცლის ქვედა ნაწილში მკვეთრ ან პულსირებად ტკივილთან ერთად ისინი შეიძლება მიუთითებდნენ პლაცენტის აშრევებაზე. ორსულობის 32-ე კვირას ეს პათოლოგია ქალების 0,5-1,5%-ში გვხვდება. მისი წარმოქმნა შეიძლება დაკავშირებული იყოს ფიზიკურ ან ემოციურ გადატვირთვასთან, ორსულის მავნე ჩვევებთან და 40 წელზე უფროს ასაკთან, მაგრამ ყველაზე ხშირად მესამე ტრიმესტრში ეს ხდება მომატებული არტერიული წნევის გამო. თუ პლაცენტა 30%-ით და ნაკლებად არის აშრევებული, ნაყოფის სიცოცხლისუნარიანობას პრაქტიკულად არაფერი ემუქრება და ამ შემთხვევაში შესაძლებელია სპეციალური სამედიცინო პრეპარატების გამოყენებით მკურნალობა; თუ 50%-ით – ბავშვს უვითარდება ჰიპოქსია და ხდება განვითარების შეფერხება. პლაცენტის სრული აშრევების შემთხვევაში ნაყოფის სიკვდილი პრაქტიკულად გარდაუვალია.
როგორც სხვა ვადებზე, ორსულობის 32-ე კვირასაც არსებობს სამშობიარო გზებში ინფექციის მოხვედრის რისკი. ამაზე მიუთითებს ჩირქოვანი, ლორწოვანი ან უჩვეულო ფერისა და სუნის გამონადენი. თუ დაავადება არ განიკურნება, მშობიარობის დროს შეიძლება დაინფიცირდეს ბავშვი, რაც მომავალში დიდ პრობლემებს გამოიწვევს.
სამედიცინო დაკვირვება
ორსულობის 32-ე კვირა ის დროა, როდესაც ტარდება მესამე დაგეგმილი ულტრაბგერითი გამოკვლევა. ნუ გაგიკვირდებათ, თუ ამჯერად ეკრანზე ბავშვს მთლიანად ვერ დაინახავთ: ის უკვე იმდენად დიდია, რომ მისი დათვალიერება მხოლოდ ფრაგმენტულად არის შესაძლებელი.
ულტრაბგერითი გამოკვლევა აჩვენებს, რა მდგომარეობაშია პლაცენტა, რა პოზიცია დაიკავა თქვენმა პატარამ, საშუალებას მოგცემთ განსაზღვროთ მისი სიმაღლე და წონა. გარდა ამისა, ულტრაბგერითი გამოკვლევა გამოავლენს პრობლემებს, რომლებმაც შეიძლება გავლენა მოახდინონ ორსულობის მიმდინარეობაზე:
- ფეტოპლაცენტური უკმარისობა;
- პლაცენტის წინამდებარეობა;
- ნაყოფის დუნდულოვანი ან გვერდითი წინამდებარეობა;
- მრავალწყლიანობა ან ოლიგოჰიდრამნიონი;
- საშვილოსნოს ყელის პათოლოგია;
- ჭიპლარის პათოლოგია.
თუ ულტრაბგერითი დიაგნოსტიკის დროს რაიმე პათოლოგია გამოვლინდა, ჩვეულებრივი შარდისა და სისხლის ანალიზების გარდა, ექიმი დანიშნავს დამატებით გამოკვლევებს.
რეკომენდაციები
ორსულობის 32-ე კვირას ძალიან მნიშვნელოვანია თქვენი ემოციური მდგომარეობის გაუმჯობესება. მუდმივად დაუკავშირდით თქვენს პატარას. არა მხოლოდ დედამ, არამედ მამამაც უნდა ელაპარაკოს პატარას და მოეფეროს მუცელს: მშობლების ხმები და შეხება განსხვავებულია და თქვენი პატარა მათზე სხვადასხვანაირად რეაგირებს.
თუ მშობიარობის შიში გაქვთ, ისაუბრეთ ამაზე ექიმთან. სპეციალისტი უპასუხებს ყველა თქვენს კითხვას და თქვენ შეძლებთ უფრო ობიექტურად შეაფასოთ სიტუაცია, წარმოსახვისთვის თავისუფლების მინიჭების გარეშე. ნერვების დასაცავად ეცადეთ თავი დაიცვათ უარყოფითი ინფორმაციისგან, ნუ დაუკავშირდებით ზედმეტად ემოციურ ადამიანებს და ნუ უყურებთ საშინელ ფილმებს. მოემზადეთ იმისთვის, რომ მშობიარობა ადვილად ჩაივლის. ცუდი ფიქრებისგან თავის დაღწევაში დაგეხმარებათ ორსულებისთვის განკუთვნილი ფიტნესი ან იოგა, ჰობი, სასიამოვნო შეხვედრები მეგობრებთან.
ორსულობის 31-32-ე კვირა საუკეთესო დროა სამშობიარო სახლის ასარჩევად. თუ კონტრაქტით აპირებთ მშობიარობას, განსაკუთრებით მნიშვნელოვანია კარგი ექიმის პოვნა. წაიკითხეთ გამოხმაურებები და კიდევ უკეთესი – ესაუბრეთ ქალებს, რომლებიც ამშობიარა თქვენთვის საინტერესო სპეციალისტმა. დაწესებულების არჩევის შემდეგ დააზუსტეთ, რა ნივთები უნდა წაიღოთ თან. თითოეულ სამშობიარო სახლს აქვს თავისი სია, მაგრამ, როგორც წესი, მასში შედის ჰიგიენური საშუალებები და ტანსაცმელი დედისა და ბავშვისთვის, საფენები და მრავალი სხვა. ასევე აუცილებელია ყველა საბუთის მომზადება და თან წაღება.
ბავშვი ინტენსიურად იმატებს წონაში, ამიტომ ამ კვირაში მნიშვნელოვანია კვების კონტროლი, რათა არ "გასუქდეს", წინააღმდეგ შემთხვევაში მშობიარობის დროს ტრავმების თავიდან აცილება შეუძლებელი იქნება. რაც არ უნდა გინდოდეთ გემრიელი, უარი თქვით ტკბილეულისა და ცომეულის მოხმარებაზე. მიირთვით მცირე ულუფებით, ხშირად. ორსულობის 31-32-ე კვირას თქვენ გჭირდებათ მაგნიუმის, თუთიის, რკინისა და D ვიტამინის შემცველი პროდუქტები. ამ პერიოდში რეკომენდებულია ღორის ხორცის რაციონიდან სრულად გამორიცხვა, ხოლო ორგანიზმიდან ზედმეტი სითხის გამოდევნისა და ნაწლავების პერისტალტიკის ნორმალიზებისთვის სასურველია ჩირის კომპოტების დალევა. გაწუხებთ მეტეორიზმის შეტევები? შეიტანეთ "მორატორიუმი" პარკოსნებზე, კომბოსტოსა და ჭვავის პურზე, ასევე ეცადეთ არ დალიოთ ჭამამდე 30 წუთით ადრე და ამდენივე დროის განმავლობაში ჭამის შემდეგ.
ამ კვირიდან დაისვენეთ 2-3 საათით მეტი, ვიდრე ადრე. მოერიდეთ ინფექციურ და გაციების დაავადებებს, რადგან ამ პერიოდში მედიკამენტოზური მკურნალობა არასასურველია. სექსი ორსულობის 31-32-ე კვირას აკრძალული არ არის და აუცილებელიც კია (მხოლოდ უკუჩვენების შემთხვევაში და აუცილებლად პრეზერვატივის გამოყენებით).
