ორსულობის 37-ე კვირა

რა ხდება?

ორსულობის 36-37-ე კვირას თქვენი პატარას ორგანიზმი გამოიმუშავებს სიცოცხლისთვის მნიშვნელოვან ჰორმონებს. ერთ-ერთი მათგანი – კორტიზონი – აუცილებელია ფილტვების სრული მომწიფებისთვის. ღვიძლში აქტიურად გროვდება რკინა. ამ მიკროელემენტის გარეშე ორგანიზმის სწორი ფუნქციონირება შეუძლებელია. ორსულობის ბოლო ტრიმესტრში ნაყოფის ღვიძლში ხუთჯერ მეტი რკინაა, ვიდრე მოზრდილებში. ეს მარაგი თქვენს პატარას სიცოცხლის პირველი ექვსი თვის განმავლობაში ეყოფა.

ორსულობის 37-ე კვირას გრძელდება ორგანიზმის ძირითადი სისტემების სრულყოფა. თავის ტვინის ნეირონები იწყებენ მიელინის გარსით დაფარვას, რაც ნერვებს სიგნალების გადაცემაში ეხმარება. ეს პროცესი ბავშვის სიცოცხლის პირველი წლის განმავლობაში გაგრძელდება.

მაგრდება ყურისა და ცხვირის ხრტილები, ხოლო თავის ქალის ძვლები კეფის რბილი ადგილების გამო კვლავ მოქნილი დარჩება, რათა პატარას გაუადვილდეს სამშობიარო გზების გადალახვა. კეფის რბილი ადგილი არის არე, სადაც ძვლოვანი ქსოვილი არ არის. ახალშობილ ბავშვს ექვსი ასეთი ადგილი აქვს, მაგრამ უმეტესობა დაბადებისთანავე იხურება. თავის ქალის ძვლების ზრდასთან ერთად კეფის რბილი ადგილები თანდათან გაქრება.

თქვენი მდგომარეობა

ორსულობის 37-ე კვირისთვის მუცელი ზრდას წყვეტს, მაგრამ ბავშვი აგრძელებს წონის მატებას, რის გამოც მისთვის სულ უფრო ვიწრო ხდება. მოძრაობისთვის პრაქტიკულად აღარ არის ადგილი, ამიტომ მოძრაობები ახლა უფრო ნაკლებია, ვიდრე ადრე. მაგრამ მაინც დღის განმავლობაში დაახლოებით 10 უნდა იყოს.

ბევრ ქალს ეწყება მუცლის დაწევა, რაც მშობიარობის მოახლოების ერთ-ერთი ნიშანია. თუ ორსულობის 37-ე კვირამდე ეს არ მოხდა, არ უნდა ინერვიულოთ: ზოგჯერ მუცელი მხოლოდ ორსულობის ბოლოს ეშვება. მაგრამ თუ ეს მაინც მოხდა, ეს არ ნიშნავს, რომ მშობიარობა ახლავე დაიწყება – სავარაუდოდ, კიდევ ერთი-ორი კვირა მოგიწევთ ლოდინი. ახლა სუნთქვასთან დაკავშირებული პრობლემები აღარ იქნება, თუმცა შარდის ბუშტზე ნაყოფის ძლიერი ზეწოლის გამო ტუალეტში უფრო ხშირად მოგიწევთ სიარული.

საშვილოსნოს უზარმაზარმა ზომამ კვლავ შეიძლება გამოიწვიოს დისკომფორტი ხერხემალში. ეცადეთ მეტი დაისვენოთ და სახლის ძირითადი მოვალეობები მომავალ მამასა და ოჯახის სხვა წევრებს გადააბაროთ.

ორსულობის 36-37-ე კვირას ძლიერდება და ხანგრძლივდება ბრექსტონ-ჰიქსის საწვრთნელი შეკუმშვები. ამასთან, თქვენ გაქვთ საშვილოსნოს კუნთების დაძაბვისა და მოდუნების მკაფიო შეგრძნება, მაგრამ არანაირი ტკივილი არ უნდა იყოს. მუცლის ქვედა ნაწილში ტკივილი და შეკუმშვების რეგულარული ხასიათი მშობიარობის დაწყებაზე მიუთითებს. ასეთ შემთხვევაში სასწრაფოდ უნდა მიმართოთ ექიმს, რომელიც გადაგიყვანთ სამშობიარო სახლში.

ორსულობის 36-37-ე კვირას საშოდან გამონადენის რაოდენობა შეიძლება გაიზარდოს. ამაში საშიში არაფერია – დადგა ლორწოვანი საცობის გამოსვლის დრო: მისი ნაწილაკები წარმოადგენს ლორწოს გროვებს წითელი ზოლებით, რომლებიც შეიძლება აღმოაჩინოთ ღია ფერის გამონადენში. ზოგჯერ საცობი მთლიანად გამოდის ერთბაშად. ამ შემთხვევაში თქვენ დაინახავთ დაახლოებით ორი სუფრის კოვზის მოცულობის ლორწოს გროვას.

რისკ-ფაქტორები

ორსულობის 36-37-ე კვირის ერთ-ერთი რისკ-ფაქტორია B ჯგუფის სტრეპტოკოკი. ეს არის ბაქტერია, რომელსაც შეუძლია დასახლდეს საშოში ან სწორი ნაწლავის გარშემო არეში. B ჯგუფის სტრეპტოკოკი გვხვდება ჯანმრთელი მოზრდილების თითქმის 35%-ში. მაგრამ თუ მისი კოლონიები ორსულ ქალშია, მშობიარობის დროს შეიძლება დაინფიცირდეს ბავშვი. ხოლო ინფიცირებულ ახალშობილებს სჭირდებათ ანტიბიოტიკებით სერიოზული მკურნალობა და საავადმყოფოში ყურადღებით დაკვირვება, რადგან B ჯგუფის სტრეპტოკოკმა შეიძლება გამოიწვიოს ჩვილებში საშიში გართულებები, როგორიცაა მენინგიტი, პნევმონია და სისხლის მოწამვლა. თუ ამ ბაქტერიაზე ანალიზის შედეგები დადებითია, ექიმი, სავარაუდოდ, დანიშნავს ანტიბიოტიკების მიღებას მშობიარობამდე და მშობიარობის დროს. ეს ღონისძიება ხელს შეუწყობს ინფექციის ბავშვზე გადაცემის თავიდან აცილებას.

მშობიარობა ორსულობის 37-ე კვირას უკვე არ წარმოადგენს სერიოზულ საფრთხეს. მუცლისა და წელის არეში კრუნჩხვითი ტკივილებისა და სანაყოფე წყლების ნაადრევი დაღვრის შემთხვევაში უნდა დარეკოთ სასწრაფო დახმარების სამსახურში. ზოგჯერ ქალს ნაადრევი მშობიარობაც კი სჭირდება – მაგალითად, თუ დიაგნოზირებულია:

• ნაყოფის ჰიპოქსია;
• ინფექციური დაავადება;
• პლაცენტის აშრევება;
• ბავშვის ჭიპლარით შემოხვევა.

ამ შემთხვევებში მშობიარობის მეთოდს ექიმი ირჩევს.

სამედიცინო დაკვირვება

ვიზიტის დროს გინეკოლოგი გაგსინჯავთ სავარძელზე საშვილოსნოს ყელის მშობიარობისთვის მზადყოფნის დასადგენად, რადგან ორსულობის 36-37-ე კვირიდან თქვენს პატარას შეუძლია ნებისმიერ წუთს მოუნდეს დაბადება. ვაგინალური გამოკვლევის დროს ექიმი ყურადღებას აქცევს საშვილოსნოს ყელის მდებარეობას, სიმკვრივესა და სიგრძეს.

სანამ თქვენი პატარა დედის მუცელში ცხოვრობს, საშვილოსნოს ქვედა სეგმენტს სქელი კედლები აქვს, რომლებიც მშობიარობის დროს იწყებენ გაჭიმვას, რბილდებიან და თხელდებიან. ამას „გასწორება“ ეწოდება. მშობიარობის დაწყებამდე ის ნულის ტოლია, აქტიური მშობიარობის დროს საშვილოსნოს ყელის კედლები 50%-ით სწორდება, ხოლო ბავშვის დაბადებამდე – 100%-ით.

ასევე ორსულობის 37-ე კვირას ექიმი ამოწმებს საშვილოსნოს ყელის გახსნის (გაჭიმვის) ხარისხს. ეს მაჩვენებელი სანტიმეტრებში განისაზღვრება. სრული გახსნისას ყელის სიგანე 10 სმ-ს აღწევს. თუ გამოკვლევის დროს აღმოჩნდება საშვილოსნოს ყელის მშობიარობისთვის მოუმზადებლობა, ექიმი დანიშნავს მედიკამენტოზურ ან არამედიკამენტოზურ საშუალებებს მისი სიმწიფის გასაზრდელად.

ორსულობის 37-ე კვირას გასინჯვისას გინეკოლოგი იღებს ნაცხს. ანალიზების შედეგები საშუალებას მოგცემთ განსაჯოთ სამშობიარო გზებში ინფექციის არსებობა ან არარსებობა. საჭიროების შემთხვევაში ინიშნება მკურნალობა, რადგან დაბადების მომენტში ბავშვი მაქსიმალურად უნდა იყოს დაცული შესაძლო ინფექციისგან. ასევე ამ ვიზიტის დროს ექიმი მოუსმენს თქვენი პატარას გულისცემას, გაგიზომავთ წონასა და არტერიულ წნევას, შეაფასებს მენჯის სიგანესა და ნაყოფის წინამდებარეობას.

ამ ვადაზე ულტრაბგერითი გამოკვლევა ჩვეულებრივ არ ტარდება. ის შეიძლება საჭირო გახდეს მხოლოდ იმ შემთხვევაში, თუ ორსულობის დროს რაიმე გადახრა გამოვლინდა.

რეკომენდაციები

ორსულობის 37-ე კვირიდან თქვენი პატარა ნებისმიერ დროს შეიძლება დაიბადოს. შეამოწმეთ, ყველაფერი მზად არის თუ არა სამშობიარო სახლისთვის. ბოლო მომენტში ამისთვის დრო აღარ გექნებათ. ჩანთების ჩალაგებისას არ დაგავიწყდეთ ჰიგიენური საფენების (არა ტამპონების!) და ორი-სამი ბიუსტჰალტერის ჩადება.

თუ უძილობა გაწუხებთ, უფრო აქტიური იყავით დღის განმავლობაში. ორსულობის 36-37-ე კვირას შეგიძლიათ შეასრულოთ მარტივი საოჯახო საქმეები, ისეირნოთ სუფთა ჰაერზე, დაესწროთ მომავალი დედების კურსებს და ივარჯიშოთ ორსულებისთვის განკუთვნილი ტანვარჯიშით. ხოლო დასაძინებლად წასვლამდე კარგად გაანიავეთ საძინებელი.

მუდმივად აკონტროლეთ კვება. ორსულობის 37-ე კვირას უნდა მიირთვათ რაც შეიძლება მეტი რძის პროდუქტი. თქვენს ყოველდღიურ მენიუში უნდა იყოს: კეფირი, ხაჭო, ნატურალური იოგურტი, მაწონი, არაჟანი და ყველი. გარდა ამისა, ძალიან გჭირდებათ რკინითა და C ვიტამინით მდიდარი პროდუქტები.

ორსულობის 37-ე კვირას ბევრი წყვილი უარს ამბობს ინტიმურ ურთიერთობებზე. კარგი ფიზიკური მდგომარეობისა და სამედიცინო უკუჩვენებების არარსებობის შემთხვევაში, სექსი ამ ეტაპზე აკრძალული არ არის.