რა ხდება პატარასთან 38-ე კვირას?
პატარას ზომაა: 49 – 51 სმ, ხოლო წონა: 3000 – 3200 გრ
ნაყოფს კარგად აქვს განვითარებული კანქვეშა ცხიმოვანი ქსოვილი, კანი აღარ არის წითელი და დანაოჭებული, არამედ ვარდისფერი და ხავერდოვანი. ორსულობის 38-ე კვირას ბავშვის სხეულის ზოგიერთ ადგილას ჯერ კიდევ რჩება ფუმფულა თმა (ლანუგო). ყურის ნიჟარების ხრტილები გამაგრდა და ელასტიკური გახდა, ფრჩხილები – მკვრივი და გრძელი; ბავშვის მკერდზე უკვე შესამჩნევია არეოლების წრეები, ხოლო ტერფის ძირები 2/3-ით არის დახაზული. თავის ქალის ძვლები გამაგრდა, მაგრამ მათ შორის მოძრაობა შენარჩუნებულია: ეს გაუადვილებს ბავშვის თავს სამშობიარო გზაზე გავლას.
ორსულობის 38-ე კვირისთვის დასრულდა გარეთა სასქესო ორგანოების განვითარება: ბიჭებში სათესლე ჯირკვლები ჩამოვიდა სათესლე პარკში, ხოლო გოგონებში სასქესო ნაპრალი დაიხურა და მცირე სასქესო ბაგეები დაიფარა დიდით. დასრულდა ფილტვების სრულყოფა: ალვეოლები ჩამოყალიბდა და პრაქტიკულად თითოეულ მათგანზე წარმოიქმნა სურფაქტანტი. დაბადების შემდეგ ბავშვის ფილტვები გაიშლება და ფუნქციონირებას დაიწყებს.
ორსულობის 38-ე კვირას პლაცენტა იწყებს დაბერებას. ქრება მისი წინანდელი სისხლით სავსე მდგომარეობა და სისხლძარღვები თანდათანობით ცარიელდება. პლაცენტის ქსოვილებში წარმოიქმნება კისტები და კალციფიკატები, მცირდება მისი სისქე. ჟანგბადისა და საკვები ნივთიერებების მიწოდების შეზღუდვის გამო ნაყოფის ზრდა ნელდება. წონის მატება შეფერხდება, ხოლო სასარგებლო ნივთიერებები, რომლებსაც ბავშვი დედის სისხლიდან იღებს, ძირითადად მის სიცოცხლის უზრუნველყოფაზე წავა. სტაბილურად მცირდება ამნიონური სითხის რაოდენობა, მაგრამ მისი მოცულობა საკმარისი იქნება ბავშვის დასაცავად დაბადებამდე.
ორსულობის 37-38-ე კვირას ნაყოფის მოძრაობები ნელ მოტრიალებებსა და ბიძგებამდე დაიყვანება, მაგრამ, მიუხედავად თავისი ნელი მოქმედებისა, დედამ ყოველდღიურად უნდა იგრძნოს არანაკლებ 10 მოძრაობა. მოძრაობების არასაკმარისი რაოდენობის ან ხანგრძლივი არარსებობის შემთხვევაში აუცილებლად უნდა მიმართოთ ექიმს.
რა ხდება დედასთან 38-ე კვირას?
მშობიარობამდე მუცელი უნდა დაეშვას ქვემოთ: ნაყოფის თავი თავსდება მენჯის ღრუში და ბავშვი იღებს საბოლოო მდგომარეობას. ახლა საშვილოსნო არ უშლის ხელს დიაფრაგმის მოძრაობას და არ ახდენს ისეთ ძლიერ ზეწოლას შინაგან ორგანოებზე, ამიტომ თქვენ უფრო ადვილად სუნთქავთ, ხოლო გულძმარვა გაწუხებთ მხოლოდ მავნე საკვების მიღების დროს. თუმცა ბავშვის თავის ქვემოთ დაწევის გამო ძლიერდება დატვირთვა მენჯის ძვლებზე. ამიტომ შეიძლება გაგიჩნდეთ ტკივილი ამ მიდამოში, გავის არეში და ფეხის უკანა ზედაპირზე. ხოლო შარდის ბუშტზე ზეწოლა ხშირი შარდვის მოთხოვნილების მიზეზი ხდება.
ორსულობის 37-38-ე კვირისთვის სარძევე ჯირკვლები კიდევ უფრო იზრდება. კანის ქვეშ ჩანს წვრილი ვენების ქსელი, არეოლები კიდევ უფრო მუქდება და მათზე მკაფიოდ ჩანს ცხიმოვანი ჯირკვლების „კვანძები“. ამ პერიოდში ძუძუსთავები ძალიან მგრძნობიარე ხდება და მათ შეხებაზე საშვილოსნოს კუნთები იკუმშება. დროა მოამზადოთ მკერდი ბავშვის კვებისთვის. ფრთხილად დაიმასაჟეთ ძუძუსთავები უხეში პირსახოცით, მაშინ მომავალში მათზე ბზარები არ გაჩნდება.
რისკ-ფაქტორები
თუ ორსულობის 38-ე კვირას მკვეთრად გაგიძლიერდათ შეშუპება, დაიწყო დიარეა, ღებინება, გაგიჩნდათ თავბრუსხვევა, თავის ტკივილი ან მხედველობის დარღვევა, ეს შეიძლება იყოს პრეეკლამფსიის – გესტოზის სერიოზული გართულების ნიშნები. ასეთი მდგომარეობა საშიშია დედისა და ბავშვის ჯანმრთელობისთვის, ამიტომ ბევრ შემთხვევაში საჭიროებს გადაუდებელ მშობიარობას.
ასევე უნდა მიმართოთ ექიმს, თუ ორსულობის 37-38-ე კვირას შეამჩნიეთ სისხლიანი გამონადენი საშოდან ან სანაყოფე წყლების ჟონვა. საშიშია ბავშვისთვის გენიტალური ჰერპესიც. ამ დაავადების გამოვლენა საკეისრო კვეთის ჩვენებაა.
ორსულობის 38-ე კვირას არასასურველია გაციება და გრიპი – და არა იმდენად ბავშვისთვის (მისი ინფიცირების ალბათობა ახლა მინიმალურია), რამდენადაც თქვენთვის, რადგან ეს დაავადებები ართულებს მშობიარობის მიმდინარეობას. ამიტომ უნდა მოერიდოთ ხალხმრავალ ადგილებს, დაამატოთ თქვენს რაციონში ხახვი და ნიორი, ხილი და ბოსტნეული, მიიღოთ ექიმის მიერ რეკომენდებული ვიტამინების კომპლექსი.
სამედიცინო დაკვირვება
ორსულობის 38-ე კვირას ექიმი მოუსმენს თქვენი პატარას გულს, გაგიზომავთ არტერიულ წნევას და დაგინიშნავთ შარდის საერთო ანალიზს. ნორმალური მაჩვენებლების შემთხვევაში სანერვიულო არაფერია. მაგრამ თუ წნევა მომატებულია ან შარდში ცილა აღმოჩნდა, საუბარი შეიძლება იყოს ორსულობის გართულებაზე, რომელიც ჰოსპიტალიზაციას საჭიროებს.
ორსულობის 37-38-ე კვირას ულტრაბგერითი გამოკვლევა ტარდება მხოლოდ ჩვენებების მიხედვით – მაგალითად, თუ საჭიროა საშვილოსნოში ნაყოფის მდებარეობის დაზუსტება, პლაცენტის სიმწიფის ხარისხის, ამნიონური სითხის რაოდენობის შეფასება ან ბავშვის ჭიპლარით შემოხვევის გამორიცხვა. გამოკვლევის დროს ექიმი განსაზღვრავს ბავშვის ზომას, მისი გულისცემის სიხშირეს, ასევე ბავშვის სხეულის ცალკეული ნაწილების თანაფარდობას ერთმანეთთან.
რეკომენდაციები
მშობიარობამდე სულ ცოტა დრო დარჩა, ამიტომ, სახლიდან გასვლისას ორსულობის 38-ე კვირას, ყოველთვის თან იქონიეთ საჭირო საბუთები
ორსულობის 38-ე კვირა შესაფერისი დროა სხვადასხვა საქმის დასასრულებლად. შეამოწმეთ, რა გაკლიათ ჯერ კიდევ და წადით მაღაზიებში ან შეადგინეთ დეტალური სია მეუღლისთვის.
მშობიარობამდე რამდენიმე კვირით ადრე აუცილებელია რაციონში ცვლილებების შეტანა. რეკომენდებულია ძნელად მოსანელებელი პროდუქტების, პარკოსნების, წითელი ხორცის, სოკოს, ქერის ფაფის, ყავისფერი ბრინჯის გამორიცხვა. ეს საშუალებას მისცემს საჭმლის მომნელებელ სისტემას მოემზადოს და გაიწმინდოს ნაწლავები. მაგრამ ამავე დროს საკვები საკმარისად კალორიული უნდა იყოს. ორსულობის 37-38-ე კვირას გაზარდეთ მოხმარებული ცილის რაოდენობა რძის პროდუქტების, თევზისა და კვერცხის ხარჯზე. გარდა ამისა, რძე, კეფირი და ხაჭო შეიცავს ბევრ კალციუმსა და კალიუმს, რომლებიც თქვენს პატარას ამ ვადაზე ძალიან სჭირდება.
შეშუპების შესამცირებლად აკონტროლეთ დალეული და გამოყოფილი სითხის მოცულობა, შეზღუდეთ მარილისა და შაქრის მოხმარება, სრულად უარი თქვით შებოლილ, მწნილ და ცხარე პროდუქტებზე. ხოლო წონის მატების დასარეგულირებლად დაგეხმარებათ განტვირთვის დღეები.
სექსმა ორსულობის 37-38-ე კვირას შეიძლება გამოიწვიოს მშობიარობის დაწყება. მიჰყევით თქვენი გინეკოლოგის მითითებებს და თუ ექიმმა აკრძალა სქესობრივი კონტაქტი, არ უნდა უგულებელყოთ ეს.
