როგორ ემზადება ორგანიზმი ჩასახვისთვის?
მეან-გინეკოლოგიური თვალსაზრისით, თქვენ ორსულობის მე-2 კვირაში ხართ, თუმცა რეალურად ის ჯერ არ დამდგარა. საქმე იმაშია, რომ ექიმები ვადას ითვლიან ბოლო მენსტრუაციის პირველი დღიდან.
ამჟამად ის დასრულდა და თქვენ დაიწყეთ ფოლიკულის აქტიური ზრდა – ბუშტუკის, რომელშიც კვერცხუჯრედია მოთავსებული. დაახლოებით ციკლის მე-10-16 დღეს ის მაქსიმალურ ზომას მიაღწევს და გასკდება, გამოათავისუფლებს კვერცხუჯრედს – დადგება ოვულაცია. თუ 48 საათის განმავლობაში მოხდება დაუცველი სქესობრივი აქტი და კვერცხუჯრედი შეხვდება სპერმატოზოიდს, დიდი ალბათობით მოხდება ჩასახვა. ამ მომენტიდან დაიწყება თქვენი პატარას სიცოცხლე! განაყოფიერების მომენტში უკვე იწყება მომავალი ბავშვის ხასიათის ბევრი შტრიხის, მისი გარეგნობის და გემოვნების პრეფერენციების ჩამოყალიბებაც კი.
რა ცვლილებები ხდება თქვენს ორგანიზმში?
ორსულობის მე-2 კვირაში თქვენი ორგანიზმი აქტიურად ემზადება ჩასახვისთვის: ფართოვდება საშვილოსნოს სისხლძარღვები, იზრდება მისი ლორწოვანი გარსი. შეიძლება გაგიჩნდეთ გამჭვირვალე, ბლანტი გამონადენი, რომელიც კვერცხის ცილას ჰგავს – ეს მოახლოებული ოვულაციის ნიშანია. უშუალოდ კვერცხუჯრედის გამოსვლის დღეს შეიძლება იგრძნოთ სიმძიმე და მსუბუქი ტკივილი მუცლის ქვედა ნაწილში, ზოგიერთ ქალში ოვულაციას თან ახლავს მცირე სისხლდენა. ძალიან სავარაუდოა, რომ ორსულობის მე-2 კვირაში იგრძნობთ სექსუალური ლტოლვის გაძლიერებას. შესანიშნავი საბაბია მოაწყოთ რამდენიმე რომანტიკული საღამო მეუღლესთან ერთად!
ანალიზები და გამოკვლევები
ციკლის მე-2 კვირაში ღირს მცირე მენჯის ორგანოების ულტრაბგერითი გამოკვლევის გაკეთება. ის საშუალებას მოგცემთ თვალყური ადევნოთ საშვილოსნოს კედლების გასქელებასა და ფოლიკულის ზრდას, ასევე დაახლოებით განსაზღვროთ ოვულაციის თარიღი.
ეს საინტერესოა
ოვულაციის დროს ქალებში რამდენჯერმე მძაფრდება ყნოსვა.
კვირის საქმე
ოვულაციამდე დღეებში ღირს თქვენი მენიუს გამდიდრება ფოლიუმის მჟავის შემცველი პროდუქტებით: ის ზრდის წარმატებული ჩასახვის შანსებს. ესენია ისპანახი, თხილი, პარკოსნები, ჭარხალი, ნიახური, გოგრა, ღვიძლი.
